امتحانات .. امتحانات !
قال وأنا ما صدقت أتخرج من الجامعة عشان بعد أقل من عشر سنين أدخل أولى ابتدائي تاني! و تالت ! و رابع!!
و 5+6=11 و أكبر مِن و أصغر مِن ؛ بس مافيش يساوي !
و أ أرنب مش أسد
الأسد وحِش بياكل الناس
الأرنب طيب بياكل الجزر
و الجزر بيمسكوه قدام الحمار .. و الحمار يجري و يجر العربيه .. و احنا راكبين العربيه ..
لأ مش إحنا ؟؟ أمال مين ؟؟
إيه ده ؟ إحنا الحمار !!! بس الحمار مفرد و إحنا جمع !
اسم جنس !
طيب !
قال و إحنا ما صدقنا عملنا ثورة و اتخرّجنا من نظام الكبت و القهر و التخلف و الإجرام ..
لقينا نفسنا دخلنا كي جي ون و مش عارفين الألِف من كوز الدُّرَه !
سوْري ! آي مين ذا إيه فُرم ذا هاوس !
و الإخوان اللي بقالهم 80 سنة بيلعبوا .. قصدي بيدرسوا سياسه دخلوا ملاحق !
و شكلهم مش ح يحصّلوا حتى التقدير الشعبي !
معلهش ماهو من عاشر القوم ..
هوّ إحنا في إيه ؟
برمهات .. روح الغيط وهات !
ده وقت الجمع و الالتقاط ( رجعنا لإنسان العصر الحجري ) ! كلُّه بيلقّط رزقه دلوقت !
لكن إحنا مستنيين أوان الدرس !
و الدرس مش درس الكتب ؛ لكن درس القمح ..
و درس القمح يعني حصدُه ..
طب هوّ احنا زرعناه ؟
اسألوا هاتور !
هاتور أبو الدهب المنتور ..
ها يا فلاحين يا أهالينا و حبايبنا : نترتم القمح في هاتور ؟
و لاّ ما لقيتوش مكان تنتروا فيه بعد ما بنيتم على الأرض اللي جرّفتوها ؟
طب جرّفوها ليه ؟
عشان إحنا جرّفناهم !
إحنا ؟
نظام مبارك !
هوّ احنا نظام مبارك ؟
سكتنا !
طب لمّا نطقنا ؟
رحنا نهد للّي بنوا و نجرّف المتجرّ ف تاني !
يا اخوانّا : الدرس .. الدرس !
كلنا مستنيين بشنس !
بشنس يكنس الغيط كنس !
يعني الحصد في بشنس ؟
بشنس يعني يونيو ..
طب فيه اللي يتحصد و الّلا ح نكنس التراب ؟
ح نجمع قمح و اللا ح نجمع الجزم اللي اترفعت من أول الثوره لحد دلوقت و نعيد التشكيل السريالي اللي عمله الإسرائيليين و نبني بيها أهرامات في سينا ؟
و : صباح الخير يا سينا .. يا سينا ..
ألّه ؟! دا عيد سينا لسّه معَدّي !!
و عدّى النهار ! و المغربيّه جايّه تتخفى ورا ضهر الشجر !
و لجل ما نتوه في السِّكه : شالت من ليالينا القمر !
قال و إيه : السلفيين كانوا بيشتموا في الثوريين عشان بيتظاهروا و يروحوا وزارة الدفاع ! قال و إيه : دم الشهُّدَا !
قال و إيه دلوقت: استبعاد أبو اسماعيل !
طب حِلّوها كده أكبر من و أصغر من ؛ و افتكروا : ما فيش يساوي !
و ما فاضلش غير المسحوله !
المسحول يا جدعان ! النساء هنا مُتَدَرِّعات .. نعم نعم !
و عملنا مفروكه و رشينا على وِشّها تراب !
و كان فاضل ع الحِلو دقّه !
و " ارمي لي بلحه يا غراب يا ابني !" يقول لها :
" فاااكره المِدَقّه ورا القاعه !"
يطير و يحُطّ على شجرة توت ..
" ارمي لي توته يا غراب يا ابني ! " يقول لها :
" فاااكره المِدَقّه ورا القاعه !"
يا ما جاب الغراب لأمه !!
إحنا غِربان ؟؟!!
لأ .. العفو ! إحنا عصافير ..
و الفزوره تقول : كان فيه عصافير كتير على الشجره ..
صيادين كتير برضو ضربوا نار .. اللي صاد .. صاد .. و اللي طاش طاش ..
السؤال : فاضل كام عصفور على الشجره ؟
مع الأخذ في الاعتبار إن أمهم ما بتسيبش العِشّ و تطير أبداً ؟
ـ العناصر أربعه .. و ( مصر) كلمه من ثلاثة أحرف ..
السؤال : اقرأها بطريقه تزوِّدها العضو الرابع و تجعلها مكتملة العناصر !
و السؤال الأخير :
في نظرك : ما هو أرفع تقدير يحصل عليه الطالب في حياته ؟
أسيبكم أنا بقى تحِلّوا و أروح أحفظ {قل هو الله أحد } !
ليست هناك تعليقات:
إرسال تعليق