( يا مُرِّك يا نعمه .. يا مُرِّك يا نعمه ) !!
هذه عبارة الممثله إنعام سالوسه في شخصية نعمه زوجة الظالم علوان أبو البكري ( المغلوبة على أمرها ) في مسلسل ذئات الجبل ..
و مُرِّك يعني المرار الذي تعيشين فيه و تتجرعينه يا نعمه !
لي صديقة اسمها نعمه .. لأ حرام عليكم ما تظلموهاش عشان اسمها ! دي لسه مقري فتحتها من أسبوعين فاتوا بس !
نعمه انتخبت صباحي !
يعني إيه كوكاكولا زيرو ؟ يعني موسى و أبو الفتوح يعملوا مناظره تخرج مؤيد صباحي !
دي كانت نكته على الفيس بعد المناظره !
اتسليتوا ؟؟ و لاّ لسّه ؟؟
لا معلش التسليه جايه جايه ! فيلم أكشن ما حصلش ( غير في سوريا ) بطولة توم كروز بذات نفسيّته ! بس ح يقلب على أرنولد شوارزنجر في الآخر !
و المصيبه إن السيناريو مسروق و متعاد بس تقولوا إيه بقى ؟ الجماهير عايزه كده ! عارفين إنتوا طبعاً المؤثرات و سنينها و اسألوا فيلم كنج كونج !
الجمعيه التأسيسيه للدستور كلاكيت تاني مرّه !
قلنا للإخوان كده ما صدقوش ..
يعني يا إخوان بالذمه و الأمانه ما رضيوش يدوكم سلطه لمدة شهر ح يسلموكم مصر بحالها ع المفتاح ؟
مش حنقول إيه اللي نجّح مرسي ، أصوات الإخوان و السلفيين اللي ما اقتنعوش بأبو الفتوح و الشعب المصري اللي عارف إنكم كنتم بتساعدوه حتى في أسوأ أيامكم ، و الأصوات اللي راحت لأبو الفتوح لأنهم اعتقدوا إنه مخرج مناسب للأزمه بين العلمانيين و الإسلاميين ، و أصوات شفيق اللي حوالي 3 مليون منها من المسيحيين و الباقي من حبايب و مستفيدين الحزب الوطني ، و طبعاً المفاجأه اللي صنعها الإعلام : حمدين ! النخبه أخيراً أثرت في الناس ! قلنا لكم الدوي على الودان أمَرّ من السحر !
الإخوان و سبّهم و انتقاصهم و تخوينهم و تحقير أي حاجه يعملوها زاد يومي للإعلام بكافة وسائله ، و التمجيد في العادي لحد رفعه للسما و هو أقل من العادي حتى ! عملهم اليومي !
قلنا لكم لو فاكرين نفسكم ح تخلّصوا مصر ف ( ما ينوب المخلّص إلا تقطيع هدومه ) !
لو من الأول لعبتوها صح في الجمعيه التأسيسيه كان زمان الدستور مكتوب !
لو رضيتوا ترشحوا حد غيركم و تدعموه انتم و السلفيين كنا خلصنا !
النهارده علاء الأسواني بيقول لو الشعب المصري كله انتخب مرسي مش ح ينجح ، و أنا بقول لكم محدش ح يوصل للانتخابات أصلاً ! لأنها ح تولع دا إذا ما كانتش ولعت فعلاً !
القوى المدنيه ح تنزل و القله قصدي الأزيار المندسه ح تظهر و انتم عارفين الباقي !
أقول لكم نكته : مرّه شعب عمل ثوره و شال راس الظلم جات الأحزاب السياسيه و حطوله رجليه !
القوى المدنيه عندهم انفصام في الشخصيه يقولوا للإخوان قدموا ضمانات و بعدين يطلع حمدين يقول مش ح اقبل أكون نائب للرئيس !!
هوّ في ضمان أكتر من كونك نائب !!
يقدم واحد مش من الإخوان قانون العزل يقولوا مش دستوري و بتفصّلوا قوانين ،و دلوقت ح يعتصموا في الميدان عشان يتنفذ بأثر رجعي !
يشتموا في البرلمان اللي ما بيعملش حاجه و مكلمنجي ، و لما يقف للمجلس عشان يعمل حكومه تقدر تمنع البلاوي اللي عايش فيها الشعب حتى و لو لأسبوعين ؛ يقولوا ح يكوّشوا على السلطه و يشتموهم برضه !
يقولوا : يسقط يسقط حكم العسكر .. و بعدين لما المسأله واضحه وضوح الشمس يا عسكر يا ناس من اللي كانوا قاعدين معاكم في الميدان يقولوا إيه الضمانات ؟ طب ما حسني عيط لكم و في نفس الليلة بعت اللي يقتلكم ، روحوا بقى قدموا ورقة الأحزاب الذكيه اللي ح تقدمها للمرشحين الاتنين ، و ابتزوا براحتكم و انتم واقفين على قبور شهداء الثوره !
بيقولكم اخوانا السوريين : اللي يجرب المجّرب عقله مخرّب !
أهو على الأقل البرلمان حدد حد أدنى و أقصى للأجور،و تأمين صحي للمرأه المُعيله ، و أهل الشهدا إداهم ميت ألف ،و آخر حاجه المدينه اللي البلطجيه قتلوا الناس فيها في لعبة كوره و بعدين جوّعوها؛ رجّعوها مدينه حُرّه تاني و الغريبه إن خبر زي دا ما يتذاعش و يتطنطن عليه رغم إنه إنجاز لأهل البلد دي !
لأ و أنا عمّاله أقول لكم انتخبوا العوّا .. انتخبوا العوا ! قام إيه ؟ طلع للسلطه حسابات أخرى !
أي نعم هوّ ذكي و على طول لقطها إنها باظت باظت و الإخوان مش ح يحصّلوا حاجه ، بس المفروض إنه كان ينحي ذكاءه هنا و يتعامل بالضمير اللي يخلصه من ربنا ، يعني كان يقدر يقول بكل بساطه إنه بما إنه مرشح إسلامي فلازم يدعم المشروع الإسلامي مثلاً أو حتى إن شفيق عسكري و هو ضد العوده لحكم عسكري ، ليه لأنه بقت يا إما عسكر يا إما ثوره !
راحوا فين بقى بتوع يسقط يسقط حكم العسكر ؟
لأ ! مش ح تبقى دوله دينيه !
عارفين أبو رجل مسلوخه اللي بيشوي العيال اللي بتخرج بعد العصر في عين الشمس ؟
طب العيال جربوا يخرجوا ؟ طب ما تخرجوا كده و تشوفوا ح يمسككم و يشويكم و اللا دا كان عشان تتلموا و تقعدوا في البيت ؟
هوّ مش فيه دستور ح يتعمل ؟ مش فيه أحزاب ؟ مش فيه ناس ؟ مش فيه ميدان تحرير ؟ اللي خرّجكم ضد تلاتين سنه يخرجكم في الأربعه دول !
لكن عمكم شفيق قال لكم إيه ؟
على أي حال بشاير موقعة الفيل هلّت ! ابقوا اقعدوا دوروا على دم الشهدا تاني ..
المسألة في منتهى البساطه : اعكشوا الإخوان من تلابيبهم جوّا مقرّهم و اطلبوا اللي انتم عايزينه بالعقل و همّ ح يدوكم ! ليه ؟ لإنهم ما عندهمش حل تاني ! ليه ؟ لأنهم لو ما عملوش كدا مش ح يوصلوا للصناديق اللي ح يدخلهم فيها مش أقل من 15 مليون عشان الشعب مش أهبل يضيّع ثورته !
بس دا طبعاً في المشمش لأن القوى المدنيه نزلت فعلاً و انتظروا أحداث محمد محمود و مجلس الوزرا و ماسبيرو تاني و كو ! اتحرقت!
لو أبو الفتوح و صباحي عندهم ذرة عقل و ذرة انتماء للثورة يجروا يقولوا إحنا نواب الشعب و البلد بلدنا احنا و انتم ، و الثوره ثورتنا احنا و انتم ، و ح ييجي الشعب يقبّل أياديكم انتم التلاته !
غير كده يبقى مش عبَط يبقى إجرام !
و كل واحد جنبه أو يعرف حد مسيحي يقول له : عايز إيه ؟ عايز لما انت تتخانق مع حد مسلم تروحوا أمن الدوله عِدل و لا انت و لا هوّ تاخدوا حقكم و كل واحد فيكم يفتكر إن التاني هوّ اللي ادّلع و يعبّي لحد ما ييجي وقت و يفرّغ كل واحد غِلّه في البلد كلها مش بس في خصمه ؟
عايز الكنايس تتفجر عشان يوقعوكم في بعض و يستمروا همّ حاكمين ؟انتم تموتوا فيها و المسلمين يموتوا في السلَخَانات !
عايز تكون انت السبب في ضياع الثوره على الظلم و الإجرام ؟
هوّ الإخوان همّ اللي كانوا حاكمين في الفتره اللي انتم بتقولوا انكم مضطهدين فيها ؟ و لاّ اللي انتم رايحين تجيبوه و تحطوه تاني فوق رقابيكم ؟
شركاء وطن .. شركاء وطن .. هوّ فين الوطن ؟ باعوه اللي انتم رايحين تجيبوهم يكملوا بيعُه!
اتقوا ربنا اللي خلقكم مش عشان المسلمين عشان مصر .. عشان شهداءكم في ماسبيرو لما البلطجيه ضربوا في الجيش و فيكم و بعدين : الحقوا المسيحيين بيموِّتوا الجيش و دا اللي ح يحصل اليومين الجايين دول !
و كل اللي يعرف حد عايز الأمن يقوله اللي خدته في عهد حسني ابقى خده في عهد شفيق !
و كل اللي فاكره إن الإخوان ح يحجبوها بالعافيه و اللا يقعدوها في البيت يقولها بُصي على نساء الإخوان همّ أكتر نساء متعلمات في البلد !
و لا حد ح يربي دقنه غصب عنه و لا الكلام الفارغ اللي ما ينضحكش بيه غير على العيال !
همّ نفسهم مش مربيين دقنهم ! إيه السخافه دي !!
أنا عندي فكره حلوه تريّح الكل :
مرسي يدّي المناصب من دلوقت بتعهد مكتوب منه للشعب يعني يعلن حكومته من دلوقت تضم كل التيارات بحيث ييجي كل مؤيدين دول اللي همّ مصر كلها في كفّه ، و تفضل كفة شفيق و حبايبه باينه للكل يعني عايزينها تبان من غير صناديق أشبه بالتزكيه !
و غير كده يبقى :
( يا مُرّك ياللي انتخبت زي نعمه ! يا مُرّك ياللي انتخبت زي نعمه ! )
ــــــــــــــــــــــــــــــــ
كنت أبحث عن شعر عَديّد في كتب الأدب الشعبي لأضعه بسبب مذبحة الحولة !
شكلكم كده ح تحتاجوه انتم لو ما اتلمتوش في بيوتكم الأيام اللي جايّه !
انتظروا تحرش بالإخوان و السلفيين و المسيحين في الأيام القادمة ! كل ما عليكم هو أن تلزموا بيوتكم و تكونوا تماماً مثل هابيل ! نصرة الحق ليست بالنزول للشارع بل بتجنب الشارع ! أنت تنزل إذن أنت تلقى مصير الشيخ عماد عفت و قديماً قالت العرب ( من مأمنه يؤتى الحَذِر ) !
ليست هناك تعليقات:
إرسال تعليق