السوبر مان !
إتس أ بيرد ؟ إتس أ بلين ؟ نو إتز سوبر برادعي !
و معه فرقة العدالة !
إفرحوا !
ح يحكمكم فانتستيك فور !
ييييييييييييسسسسسسسسس !
طب ما يحطوش عليهم خالد علي و حازم أبو اسماعيل و يبقوا بايونك 6 ؟
بايونك أُن .. أُن .. أُن !!
لَهْ ! حرام عليكم ! ما تعرفوش بايونك 6 ؟ آه صحيح ! على التلفزيون ما كانش فيه غير : النجده يا مازنجر !
لا بس سكاراب كان مدوّخهم ! و البروفيسور شارب كان دايماً لابس بدلة بني و نضارة بس يا خسارة شعره غزير مش زي بروفيسور برادعي !
نحن نحطِّم الملل .. تحطيماً !
إتسليتوا ؟ و لاّ لسه ؟ أفكورس ! نحن نسمع كلام الكبير ، ليه ! عشانّه الكبير قوي ما خابرينش عاد ؟
إيه انتخابات و كلام فارغ ؟ عشان إيه vالد ؟
إنتو كلكو جايين إشتغلوا إيه ؟
مجلس رئاسييي آه !
دا على أساس إن ما فيش حاجه اسمها انتخابات بعد أسبوعين ! آاها !
قلنا لكم مش ح توصلوا لصناديق انتخابات يعني مش ح توصلوا لصناديق الانتخابات !
يعني همّ ح يزوروها إزاي ؟ يبقى فِركش ! بيتك .. بيتك !
عشان تعرفوا إن تصريحات الفريق للأقباط مش ميزات بيعطيها لهم و إنما لمجرد الاستفزاز للطرف الآخر للخروج و الوصول للنتيجه الحاليه و بعد شويه تولع أكتر و بعدين هوب البلد محتاجه قانون الطوارئ تاني و بح ! كل ثوره و أحفاد أحفادكم طيبين !
و الدليل : قالولوا ! قصدي قال لكم لن نركع ! و الحِدق يفهم !
سرقوا الثوره .. سرقوا الثوره !!!
طب يعِدّوا شهداء الليبراليين و حبايبهم و يعدوا شهداء الإخوان و نجنِّب الناس العاديين الغير منتمين لتصنيف سياسي و نشوف مين الحرامي فيهم !
يعني هيّ فيها لاخفيها ؟ مجلس رئاسي إيه و المركب اللي ليها ريسين بتغرق ؟ شوفوا بقى أربعة في الأربع جهات !
لأ و اللي بره كل خمس دقايق جاي ينزل براشوت ينقذ الموقف لأنه قطعاً ابن ثقافة السوبر مان اللي بيخلّص الليله بالشعاع الخارق اللي مخبيه طبعاً بنضارة كلارك كِنت ..
و الأرض تَلُفُّ حول نفسها و نرجع نقطة الصفر تاني عشان القوى المدنيه بدل ما تقرا اللوحه المكتوبه بالنيون و مرصوص عليها اللمبات بكل الألوان يطلع عندهم عمى ألوان و قصر نظر و يمكن استجماتيزم !
إزاي انتخابات و اللي فيها إخوانجي ؟ رئيس مصر إخوانجي ؟ أستغفر الله ! يعني إحنا نسلم قيادة مصر لواحد بيقول : توكلت على الله ! يا سنه سوخه ! إنتوا نسيتو الطياره و اللا إيه ؟
حد ينجدنا بقى بمقطع فيديو كده لتوفيق عكاشه !
يا جماعه .. يا جماعه .. دي الحكايه بسيطه خالص .. شيء بيحصل كل ساعه .. دي مشاكل عائليه تبتدي و يّا حُكم ( الرفاعه ) !
و الرفاعيين هما الحواه و الحواة هم أناسٌ يجيدون التعامل مع الثعابين فيخفونها حيناً و حيناً يُظهرون .. يؤمِّنُونَ بها من يشاءون أو يخوِّفُون ..
المسأله بكل بساطه إن قدامكم التلات سكك بتاعت الشاطر مرسي و اخواته :
سكة السلامه .. سكة الندامه .. سكة اللي يروح ما يرجعش !
سكة السلامه اللي الكل فاكرها كده هيّ المجلس الرئاسي ! ليه ؟ عشان كل فصائل مصر ح تبقى حاكمه ! لكن في الآخر إيه اللي ح يحصل ؟ و لا الهوا ! ح يمزّعوا مصر و يسلموها للعسكر تاني على طبق من ( فضه المعداوي) و دمتم و بالهنا و الشفا عكه ممتازه استخراع ما حصلش و محروق في الفرن تبلّعوه بكوكاكولا زيرو عشان السكر بس ..
سكة الندامه أولها ش ش ش ! و آخرها نعيق و لا حد ح يسمعكم !
سكة اللي يروح ما يرجعش عشان فيها الغوله الإخوان و الشمهورش رجال الدين في نظركم اللي ح يخطفوا مصر و ح يخطفوا منكم الحريه !
بس على مين ؟ ما كلكم الشاطر حسن ! صح ؟ طب خايفين تروحوا ما ترجعوش ليه ؟ دا كلهم أربع سنين ! بتحاسبوا الناس على الغيب و تغموا عنيكم عن المعلوم الحاضر أمامها ؟
ناس عايزه تحكمكم ديلفري و غصبن عن الملايين اللي المفروض تكون واحد منهم و تقول عايز فلان !
هوّ إيه اللي عايز فلان ؟ لأ بقى دا مفروض عليّا ؟ قال يعني المجلس المنتظر إنت اللي جايبه !
استغلال آلام الناس للحصول على المصالح الشخصيه .. لأ و إيهامهم إنهم كده بينقذوهم و بيجبّوا عليهم نسميه إيه ده ؟
سرقوا الثوره .. سرقوا الثوره !
يعني حضراتكم و أصحاب واحد مننا و النخبه الحلوه بتاعتنا يفرقوا إيه عن مبارك لما راحوا طلبوا من مرسي اللي طالع الأول يتنازل للي طالع التالت ؟؟ حسني ما غلطانش بقى لما كان بيرمي اللي طالعين أوائل مع مرتبتة الشرف و يعين السابع و اللا العاشر و اللا الميه حتى !
قالك كما تكونوا يُولَّ عليكم ما تزعلوش بقى و تروحوا تقعدوا في التحرير تاني و تقولوا ثوره !
و ييجي الناس اللي منكم و اللي من بره كمان يقولوا مجلس رئاسي و أمانه عليك ياليل طوِّل و هات الثوره م الأول !
من أنتم ؟ من أنتم ؟
ثوره .. ثوره .. إلى الأمام إلى الأمام !
إوعى وشك .. إوعى عينك .. إوعى ودنك !
ودنك منين يا جحا ؟ ؟
يقبل صباحي و أبو الفتوح يكونوا نائبين لمرسي و يمينك سِر .. و ربنا يجعل مصر كلها من أهل اليمين ..
أو كل واحد ما يهموش إلا السلطه و يغترّ بالأصوات اللي خدها و يبان على حقيقته الانتهازيه ..
و اقبلوا بقى مجلس رئاسي و مصر كلها للخلف دُر و مخالي شِل ، و هوّ بغباوته لا يمكن يكون منه اتنين أبداً و من ناري من طول لياليا من ناري و قسوة الدنيا عليّا من ناري و فرحة العزّال فيا فات المعاد و بقينا بعاد و الثوره بقت دخان و رماد !
عشان الميدان ينفضّ بدون خسائر في الأرواح و بمكاسب سياسيه يتحدوا زي ما قلنا و يعلنوا تأييدهم الواضح و الصريح و يشربوا مرسي أربع سنين زي ما بيشربوا الدوا و يخلوا السلاح صاحي و يقفوا له بالمرصاد بس المهم يبقى فيه مكان يترِصْدُوا كلهم كده فيه و يريحوا قلوب الناس و الحل دا بسيط خالص و سريع خالص فاضِلّه اسبوعين بس ..
يا إما يجيهم خابط في نافوخهم و يطوِّلوا الثوره شهور تاني لحد ما يصلّوا عليها صلاة الجنازة جنب أطفال سوريا اللي بيتقتِّلوا بسببكم إنتم !
ليه ؟ لأنكم مشغولين بالهيافه و عاملين زي النكته بتاعت العدّاء اللي قرر يدور حول العالم فانطلق من بيته و بعد ما خلّص تلات أرباع العالم قال :آه أنا تعبت ؛ و راح راجع تاني !
و بعدين سوبر مان ده بيتشلّ قدام الكربتونايت الأخضر ..
و احنا عايزينها تبقى خضرا ، بس مش الرجل الأخضر ..لأ .. الأرض الخضرا ، و الأرض نادت و قالت .. نادت و قالت :
فينك يا محبوبي فينك ؟ دي الغربه زادت و طالت يا ولدي بيني و بينك !
ـــــــــــــــــــــــ
طبعاً و تضامناً مع أحباب اللغة العربيه اللي جالهم الضغط و السكر بسبب قراءة عمنا رفعت الألمعيه قررت أتحفه بتشكيل خطبته لعل و عسى يعرف يقرأها من سيحكم بعده و قد نقلتها كوبي بست من اليوم السابع كثر الله خيرهم و هي بدل من المقال التالي حفظ الله عيونكم من البكاء الذي أحدثته و جمع شمل نياط القلب الذي مزّقته !
ليست هناك تعليقات:
إرسال تعليق