ماربرت مان
.. عطرُ الرجل .. الواااااثــِقِ من نفسه !
بسم الله الرحمن الرحيم .. إقرأ يا بُني من قول شفيق تعالى عما قُذف به علوا رقيقا " ... ..
إلى قوله ... ...
أعرب ما تشاء منها ..
عبِّر عن الصورة البلاغية الجميلة في قوله "سأستجلبُ العلماء"
باعتبار ما نقوم به من تطوير مناهج و طرق التعليم ..
سؤال إجباري :
هل تسليّت ؟
ـــــــــــــــــــــــــ
هل تذكرون خطاب : إنفّ إز إنفّ ؟
هوّ إنف إز إنف !
العبوا براحتكم .. اجروا ورا بعض .. فيه حد واقف على البوفيه أكل و حط في جيبه و وزّع الباقي على صحابه كمان و انتم لسه بتقولوا سنه حلوه يا جميل !
حد بيردد : أكل العيش .. أكل العيش .. أكل العيش ..
و الناس عايزه تاكل عيش ! " نسيو إنه محبِّش بالطوب والزلط هذا في حالة العودة أحياء من رحلة النهار و الليل !
ـ اسكنوا في اللي بنيتوه ح نسيبه لكم مش ح نهده ح نوفق الأوضاع !
و الناس عايزه تسكن " نسيو إنه من اللي حرموهم من السكن و اللي هدّوه لهم لما بنوه " بس عفا الله عما سلف دا في إيدهم المنع و المنح !
ـ ح ألغي كل اللي على التاكسي الأبيض و أمثاله .
هنا سواقين التاكسي و كل المديونين عشان ما يدخلوش السجن و عشان ياكلوا عيش ح ينسوا إن همّ اللي باعوه لهم بأضعاف مضاعفه و بالربا و همّ اللي بيسحبوا رخصهم و يسيبوهم لرحلات العذاب والضنا لحد لما يحِنّوا عليهم و يدوها لهم ، بعد دفع المعلوم طبعاً ..
الناس وقفت إلى أن تمنَّت أن تنصرف و لو إلى النار !
إيه ده ؟ يا حرام ! إنتو لسه بتدوروا على التورته ؟ ما اتقسمت و اتاكلت كمان !
شوفوا يا أسيادنا : أنا كنت فاكره إن ما فيش انتخابات ! بس بالمنظر ده ! دا لازم يعملوا انتخابات عشان يثبتوا للعالم كله إنها ح تكون فعلاً شفافه و نزيهه و الشعب المصري اختار سيادة الصوفي الهمام جامع الدين و الدنيا الإمام العادل و القائد الفذ و رجل الأزمات و رجل الدولة المدنية و حامي حمى الحريات و قاهر قاهري الشعوب الظلاميين الذين أدخلوا البلاد في نفق مظلم طويل ليصلوا بهم إلى أفغانستان كما حرموهم الأمن و الأمان و عطلوا مصالحهم و شرّدوهم و كذبوا عليهم و كان كل همهم السلطة حتى أنهم حكموا الناس في عهد حسني و قتلوا الناس في موقعة الجمل !
مش مصدقين ؟
طب نحسبها سوا : من 2ونصف إلى 3 مليون صوت قبطي .. حلو ؟ حلو !
الحزب الوطني و اللي كانوا ماسكين المحليات قولوا مليون !
عائلاتهم و حبايبهم ؟ هُبّا دخلنا في 3 مليون على الأقل تاني !
اللي ح يشتروهم بفلوسهم ؟ قولوا مليون !
رجال الأعمال و المحتكرون و الناس اللي ممسوك عليهم فساد ؟ مليون كمان !
وصلنا كام كده ؟ 9 مليون !
طيب و حبايب الدوله المدنيه ؟ الليبراليين و العلمانيين و المثقفين ؟ يا ساتر ! دخلنا في 3 تانيين !
ما تستهتروش ! طب ماشي قولوا اتنين !
و الممثلين و أصحاب المهن اللي بتتصل بالحريات اللي على البحري ؟ و السياحه و اللي بيتكسبوا من البارات و أمثالها ؟
قولوا كمان مليون !
بقوا كام دلوقتي ؟
استنوا !
حطوا عليهم كل اللي صدقوا ما لوّح لهم به من لقمة عيش و رحمة من السجن و حفظ ما بنوه من سكن مخالف و بقوا على الحديده بعدها؟
استنوا!
كل وحده ذكيه فاكره ح يقعدوها في البيت و ياخدوا وظيفتها يدوها لراجل و تحوس هيّ بعيالها !
كل واحده أذكى فاكره ح يلبسوها الحجاب بالعافيه ؟
استنوا !
المرتشين من الموظفين .. مدرسين الدروس الخصوصيه اللي ما بيشرحوش في المدرسه ؟
والبلطجيه أيضاً لهم صوت !
إحسبوا انتوا بقى أنا زهقت !
لحظه ! نسيتوا حاجه مهمه جداً ! إنه طلع صوفي ! عليه العوض و منه العوض ! و آدي ملايين الصوفيه طارت ( أو مشيت على الميه مش فارقه ! )
ها ؟ شكلها باظت ؟ باظت .
في مقابل :
مقاطعه .. مقاطعه .. مقاطعه !
ليه ؟
عشان فيه : ابتزاز .. ابتزاز .. ابتزاز !
يا تلاعبونا باللي في إيدكم يا نكسّرها لكم !
يكسروا مصر .. يكسروا الثوره .. يكسروا أحلامنا و أحلام العالم كله معانا .. عشان إيه ؟
يا نبقى رؤسا يا مافيش انتخابات !
و الساقط يرفع إيده ! هيه !
ح نسوّط على عيدنا و عيده ! هيه !
مش قلت لكم انتم محتاجين شعر عديد الأيام الجايه !
لاحول و لا قوة إلا بالله العلي العظيم !
همّ الناس اللي مؤيدين حمدين دول عندهم بصر ؟ عندهم بصيرة ؟
رايح يركب ثورة الناس ضد الحكم اللي برأ القتلة و يُشرط و يتشرّط ؟ هوّ دا اللي كان ح يحكم مصر ؟ هوّ دا واحد منّكم ؟
عشان كده حسني حكمنا تلاتين سنه ! كان واحد منّكم !
و أسهل من تنطيطه دا هوّ و غيره ما يدعموا اللي كان معاهم في الميدان ويكونوا نوّاب الشعب لأنه في المقابل شفيق فايز ..فايز !
و قال إيش رماك على المُرّ ؟ قال اللي أمَرّ منه !
بتطلبوا إعادة المحاكمة من مين ؟ من اللي أتلف الأدلة !
إمسكوا الأول و بعدين اعملوا اللي انتو عايزينه ! و لو الإخوان ساعتها ما عملوش الصح اللي الناس كلها عايزاه و همّ معاهم و انتوا معاهم ؛ساعتها بقى الشعب هوّ اللي ح يشوف شغله معاكم !
و الإخوان المفروض يطلبوا من المشايخ حبايبهم إنهم يرحمونا من أحلامهم الضخمة في المرحلة الحالية و يقولوا لهم سيبونا نفتح مصر الأول بس ربنا يكرمكم !
خطاب السياسه يختلف عن خطاب المعارك .. و البلاغة هي فن مطابقة الخطاب لمقتضى الحال ..
1 ـ و أنذر عشيرتك الأقربين ..
2 ـ فاصدع بما تؤمر و أعرض عن الجاهلين
3 ـ أُذن للذين يُقاتلون بأنهم ظُلِموا و إن الله على نصرهم لقدير .
عِدوا السنين دي كلها لأ و مع مين ؟ مع الرسول نفسه ! و بعدين ربنا يديكم طولة العمر و نكون أصلحنا البيت من الداخل و نفذنا شعار و أعِدوا بتاع اللي بتدعموهم و إلا تكونوا كمن دخل دار الحرب منفرداً و هو يعلم أنه لا ينكأ فيهم .. و العلماء بقى بيحسبوا دا من باب " و لا تلقوا بأيديكم إلى التهلكة "
يعني يأثم !
نهايته :
لازال أملنا في الله و في صحوة قلوب و عقول من صوّت لأبو الفتوح و صباحي و الباقين و أيضاً على العقلاء و المؤمنين من المسيحيين هدى الله الجميع لخير أنفسهم و أبنائهم و أحفادهم كمان .
بس تفتكروا شفيق كان حاطط العطر ده في المؤتمر بتاعه ؟
ـــــــــــــــــــــــــــــ
دا نص إعلان العطر لمن لم يشاهده !
دا نص إعلان العطر لمن لم يشاهده !
معلش أجّلت تشكيل خطبة عمنا رفعت للمره الجايّه ..
أللا ما حدش شاف شيخ الأزهر ؟ هوّ هنا و اللا مسافر؟
طب مجمع اللغه العربية هل هو قائم ؟ يمكن هوّ اللي اتحرق ساعة المجمع العلمي و الإعلام غلط في الأسماء !
طب حد يشوف لنا أستاذ حمام حتى !
طار ؟
طيب !
ليست هناك تعليقات:
إرسال تعليق