يا رب : مـــــصــــر !
بيقولوا المصريين لما يضحكوا كتير أو يفرحوا قوي يقولوا : خير .. اللهم اجعله خير !
اسكتوا .. مش أنا مصريه !
اسكتوا كمان .. مش قلت لكم في المقال اللي قبله : خير .. اللهم اجعله خير !
ربنا يستر .. صح ؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بيقولولك إيه ؟
إيه ؟
كان فيه هنا إيه ؟
إيه ؟
واحد من بلد تانيه .. دخل في التصوف جديد .. قام إيه .. قالوا له : دا مصر دي .. مليانه أوليا ..
قال يا سلام ! طب أنا ح آخد معايا كتاب وأعد الأوليا اللي فيها أشوفهم كام !
بس .. خد بعضه و راح نازل على مصر .. و قال في نفسه إيه : مش همّ أوليا ؟ يبقى همّ اللي ح يعرفوني !
دخل مصر عند الشط لقى مراكبي .. قال لو سمحت يا عم ..عدّيني الناحية التانية ..
عدّاه .. جه ينزل .. و هو بيدي له الفلوس .. قال : لا .. خليهم .. بس ابقى اكتبني منهم !
الراجل اتبهت ! المراكبي ولي ؟!!
فتح كتابه و كتب المراكبي اللي في المكان الفلاني ..
بس .. مشي شويه .. لقى حمّار ( صاحب حمار يحمل الناس عليه لتوصيلهم بالأجرة ) .. قام قال له : يا عم وصلني المكان الفلاني .. ركب .. و وصّله .. جه ينزل .. بيدي له الفلوس .. قال له : لا .. بس ابقى اكتبني منهم !
الراجل اتجنن ! قال : بلد مراكبيها ولي .. و حمّارها ولي !! ح أعد إيه ؟
بس و راح قافل كتابه و راكب الحمار و المركب و راجع على بلده تاني !ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يا اخوانا يا صوفيين ياللي بجد مش اللي داخلين في المقّدر جديد و انضحك عليهم بكلمة و اتقال على فلان دا أصله شريف .. بيقولكم المثل : أصلك فعلك ! و بيقولكم صاحب النسب : يا صفيه عمة رسول الله لا أغني عنك من الله شيئا ..
الله يخليكم بعد ما تقروا الاستغفار الكبير و الصلاة العَظيمية و المحامد الثمانية و الحزب السيفي و الحصون المنيعة و جالبة الفرج و تختموا ب لا إله إلا الله في كل لمحةٍ و نفسٍ عدد ما وسعه علم الله .. ابقوا اقولوا : يا رب مصر !
يا اخوانا ما حدش شاف واحد غلبان من اللي بياكلوا لقمتهم بعرق جبينهم يمسك في طرف جلبيته و يقوله : ادعي لمصر ربنا يسترها معاها ربنا يخليك ؟ ادعي و قول : يا رب مصر !
ما حدش شاف واحد نايم على الرصيف مش لاقي حتى غطا ؛يصحيه و يقوله ارفع إيدك معايا نقول : يا رب مصر ..
يا اخوانا يا سلفيين ما حدش شاف واحد أشعث أغبر لو أقسم على الله لأبَرّه ؟يقول له : ارفع يدك معي و قل : يا رب مصر !
يا ناس ياللي في البلد دي .. كل واحد مطعمه حلال و مشربه حلال و ملبسه حلال ؛يرفع إيده و يقول : يا رب مصر !
يا أهلنا و اخواتنا اللي في مكة ما حدش يشرب شربة ميه من زمزم و يقول : يا رب مصر ؟
يا من ينتظر خيراً للعالم كله على يد المطحونين و المحروق علمهم و حلمهم من أبناء مصر .. ارفعوا أيديكم معنا وقولوا : يا رب مصر !
ما حدش يعرف واحده رايحه تولد يقولها :ربنا يقومك بالسلامه و يقوّم مصر معاكي .. الله يخليكي: أما تجيلك الطلقه قولي : يا رب مصر !
ما حدش عنده عيل لسه بيتعلم ينطق يقوله قول يا بابا : يا رب مصر !
ما حدش صايم النهارده و هو بيفطر يقول : يا رب مصر !
حد يقرا المقال دا و يرفع إيده معايا و يقول :
يـــــــــــــــــــــــــــــــــــا رب مــــــــــــــــــــــــــــــــــصــــــــــــــــــــــــــــر !!!!
ليست هناك تعليقات:
إرسال تعليق