نكتة و معلومة و سؤال
النكتة اللي جايه دي مش جديده !
و بايخه كمان !
بيقولك : مره واحد حب يعمل زعيم أفريقي ؛ قاموا قالوا له : مصر في العش و اللا طارت ؟
المعلومه :
بيقولوا إن ( بق ) التِّعبان يظل مفتوحاً حتى بعد قتله ليُطبِق على من يقترب منه !
دا بعد أما تقتله و عليك خير !
اكتشاف يا كوتش :
أخيراً عرفت من أين أتى مسمى ( بق ) لدى المصريين !
من بوق ! بوق ! بوق !
مَثل يا معلِّم :
دا زي التعبان : لدغته و القبر !
فايده يا سيدي :
التعابين ما بيتسدش على جحورها بالإيدين و نتلدغ و نقول : لا بأس .. لا بأس !
البأس .. البأس !
رُقيه :
اللهم رب الناس : أذهب الباس .. و اشف أنت الشافي .
شربة ملح يا عم ربنا يشفيك ! دا مرضك موِّت كتير !
درهم وقاية خيرٌ من قنطار علاج !
الترياق مع مين ؟
الشعب يريد !
أنت تريد و أنا أريد و الله يفعل ما يريد .
و المريدين حواليها كتير !
راميين عُمر غيرهم م الحمير !
و جناح بعوضه ما تسوى !
و عجبي !
ياللي شغّالين من تحت لتحت و سايبين اللي فوق يهاتي !
كازّين على سنانكم تقولوا : الأعمى : ساعاتي ؟!!
دا أخره فقي يقرّي ع الميتين بشقفه و بقصماتي !
: لبِّسُوه العمه و دم الطيب و الفلاتي
خلي اللي جابه يقول حقي برقبَاتي !
ساعتها نضرب و المايل يتعدل و الريح يواتي !
ياللي ناخرين الجسد و مّشِّيينُه عكس الدماغ
و اللهْ لتخسروا الجلد والسقط م المليار للساغ
دا مافيش حاجه في المتسابه
و لا أرض ربنا للنّهّابه
دي ثورة ناس طيبين و غلابه
اللي قامها ربنا و هوّ اللي ليها مسيّر
و ان زرْع بصل انزرعتوا و اللهْ ما عن سِكِّتْهَا تدّيّر
مانتاش مانتيش مانتوش و لا ح تكونوش اللي بيغيّر
و عجبي !
الحالة : لسّه متكتف !
الصورة : مصر عمالة تنزف !
يا صبر عن الصبر مَا تعزف !
تبات نار تصبح رماد ربك يعدِّلها !
و عجبي !
يا مرسي لو الشيلة تقيلة قول : ياللي عصرتوا اللمون العصير حَض !
و انده تلاقي الميدان م الشجر رضّ !
ينفي الخبث و يكنس القض !
جذوع قوية و قلوب ندى بض !
انده يجيك اللي م الهمّ جض !
انده تلاقي اللي على دين رسوله عض!
كم مر على ثورتكم محن ؟
إيه شتتها إحنا و اللا إحن ؟
عدِّتْ و داست على سود السِّحن !
و عجبي !
الثورة أهيه !
الكلاب أهم !
الضباع و النسور و الرمم !
و السؤال بقى :
كيف تجدون قلوبكم ؟
الحمد لله !
ـــــــــــــــــــــــــــــــــــــــ
ما حدش يتعب نفسه مش موزونه !
شربة الملح : وصفة شعبية ينصح بها للملدوغ لمحاوطة السم في المعدة ( ملح كثير على ماء قليل )
يهاتي : ينادي دون مجيب
كازين : ضاغطين بغيظ على أسنانكم
الأعمى ساعاتي : مثل شعبي : الريح لما يواتي يخلي ال ......... و يخلي الاعمى ساعاتي ( مش فاكرة النصف الأول ! حد فاكره ؟ )
فقي : العامة يسمون من يقرأ على القبور في التُّرَب بمال فقي ( فقيه )
شقفة : المثل الشعبي عن الفقر : بيقرّي ( أي يطلب أن يقرأ للناس على قبور موتاهم ) بيقري ع الميتين بشقافه : يعني في مقابل شقفة ( قطعة خبز ) !
الفلاتي : المنفلت السيء
يواتي : يأتي بما نحب
الجلد جلد الذبيحة و السقط ما بداخل بطنها ( الكبده و الفشه و خلافه )
الساغ : الجنيه مائة صاغ
في المتسابه : متروكه ( و دي كلمه لشفيق ، مانتاش كلمه للبرادعي ، و مرسي قال في أحد خطاباته أنه يسد الشقوق على الثعابين و يلدغ لكن لا بأس ! )
النهّابه : اللصوص
زرع بصل : الراس تحت و الرجلين فوق
تديّر : تستدير و تلتفت
ما تعزف : لا تبتعد غاضباً
حض : حضحض أصبح حامض ( و اللي عصروا الليمون اللي انتخبوا مرسي للهروب من شفيق )
رض : امتلأ حتى ارتجّ
القض : الصخر الضخم و القضيض الحصى ، مثل عربي ع الماشي : ( جاءوا بقضهم و قضيضهم )
بض : طري
جض : صرخ من الألم
عض : تمسك
إحن : أحقاد
سحن : وجوه
الرمم : الجثث المتعفنة !
ليست هناك تعليقات:
إرسال تعليق